Isa 12 | SwhKC | STEP | Katika siku ile utasema: “Nitakusifu wewe, Ee Bwana . Ingawa ulinikasirikia, hasira yako imegeukia mbali nawe umenifariji.

Isaiah 12

Kushukuru Na Kusifu

1 ^aKatika siku ile utasema: “Nitakusifu wewe, Ee Bwana.
Ingawa ulinikasirikia,
hasira yako imegeukia mbali
nawe umenifariji.

2 ^bHakika Mungu ni wokovu wangu;
nitamtumaini wala sitaogopa.
Bwana, Bwana, ni nguvu zangu na wimbo wangu;
amekuwa wokovu wangu.”

3 ^cKwa furaha mtachota maji
kutoka visima vya wokovu.

4 ^dKatika siku hiyo mtasema: “Mshukuruni Bwana, mliitie jina lake;
julisheni miongoni mwa mataifa yale aliyoyafanya,
tangazeni kuwa jina lake limetukuka.

5 ^eMwimbieni Bwana, kwa kuwa ametenda mambo makuu,
hili na lijulikane duniani kote.

6 ^fPazeni sauti mwimbe kwa furaha, watu wa Sayuni,
kwa maana mkuu ni yeye Aliye Mtakatifu wa Israeli miongoni mwenu.”